с. Руч

И вичмис Ленин орден

М.К. Игнатовлысь «Взгляд сквозь годы» книга лыддигöн 116-öд лист бокысь синмö шыбитчис татшöм юöр: районса комсомольскöй организацияясын да том йöз пöвстын ёна сёрнитiсны Руч сиктын (Войпока грездын) чужлöм, «КИМ» колхозса вöвлöм уджалысь, а öнi — 1940 воын — Рабоче-Крестьянскöй Гöрд Армияын служитысь, ВКП(б)-са членö кандидат И.А. Попов йылысь, кодлы финнъяскöд войнаын асьсö збой да повтöм салдатöн петкöдлöмысь СССР-са Верховнöй Сöвет Президиумлöн Указ серти сетiсны Ленин орден, странаса сэкся кадö медыджыд награда.

Меным окота лоис тöдмавны кыдз позьö унджык тайö морт йывсьыс. Шыаси Михаил Константинович дорö, но сiйö вочавидзис, мый унджыксö, книгаын гижöмысь öтдор, висьтавны оз вермы, да вöзйис шыöдчыны Алек­сандр Павлович Юдин дорö. Сiдзи и вöчи. А.П. Юдин шуис, мый Иван Алексеевичöс сiйö оз помнит: сылöн кулан воын вöлi сöмын нёль арöса, но мамыс — Лидия Михайловна – вермас висьтавны унатор.

Висьтала ыджыд аттьö Нина Александровна Самариналы, кодi пыр отсасьö меным корсьысян уджын. Кор вои Керчомъяö, буретш сыкöд мунiм Лидия Михайловна дiнö. Олöма нывбаба, кодi чужлiс кольöм нэмся комынöд воясын, висьталiс:

— Me ачым Войпока грездысь, кодi вöлi Руч сиктсöвет улын. Öнi абу нин, водзтi вöлi 12 овмöс, и, менам помнитмöнъя, сэнi вöлi «КИМ» колхозлöн бригада. Сiйöн веськöдлiс буретш Иван Алексеевич Попов – ыджыд тушаа, шань да бур сьöлöма морт. Меным вöлi 14 арöс, кор война вылысь сiйö воис ёна ранитчöмöн-доймалöмöн да бара кутic бригадиравны. Сэки колхозъяслы «лэдзлiсны» вöр пöрöдан план, и бригадир котыртлiс сiйöс тыртöм да вевтыртöм могысь йöзлысь удж. Кык тöв кер дорын вöлi и ме.

Война вылын вöлiны и Иван Алексеевичлöн Василий да Евгений вокъясыс. Василий Алексеевич война вылысь гортас эз во, и бöрынджык Наталья Дмитриевна гöтырыс овмöдчис Иван Алексеевичкöд. Евгений Алексеевич кулiс во вит сайын.

Лидия Михайловналысь юалi, эм-ö сы ордын И.А. Поповлöн кöть öти фотокарточка. Лидия Михайловна вочавидзис, мый фотояс да документъяс вермасны лоны И.А. Поповлöн Агния Васильевна Малева племянница ордын, кодi олö Озъяг посёлокын. Вермасны лоны фотокарточкаяс и Кулöмдiнын олысь Елена Евгеньевна Лапченкова племянница ордын.

— Да, эм öти ли кык фото, — вочавидзис тайö нывбабаыс телефон пыр да сы дорö волöм бöрын ceтic сканируйтны фотояссö. А районса юралысь Д.А. Шатохинлысь кори машина ветлыны Озъягö. Корöмöс могмöдiс. Газет пыр висьтала сылы зэв ыджыд аттьö.

Агния Васильевналöн фотояс эз вöвны, но сiйö висьталiс, мый Руч сиктын эм Иван Алексеевич Поповлöн рамка пытшкын Ленин ордена ыджыд фотография. Колö сöмын шыасьны Анна Александровна Попова (сиктса ногöн кö, Наталь Миш гöтыр) дорö.

Кад абутöм вöсна Ручö эг ветлы, но «Парма гор» газетса главнöй редактор Василий Григорьевич Лодыгин кöсйис отсавны меным вöчны фотокопия.

Помала ciйöн, мый талун эз на сюр Ленин орденöн пасйöм кузя указлöн петан стöч кадыс, эз сюр и И.А. Поповлöн подвиг йылысь гижöд. Менам киясö эз на жö веськавлыны орден-медальяс да налöн удостоверениеяс. Шыöдча Иван Алексеевич Поповлöн рöдвуж дорö: отсыштöй меным, и ме вöча став верманасö, медым сы йылысь паметь колис нэмъяс кежлö уна йöзлöн вежöрын.

 

Василий ПОПОВ.

Снимок вылын: И А. Попов (шуйгавылын) ёртыскöд.

 

Парма гор, 2011, Декабр 20 лун.

 © Усть-Куломская межпоселенческая библиотека